Врз основа на Програмата за комунални дејности на Општина Центар за 2020 година, ставка ГДО – Субвенции за замена на кровови и поправка на лифтови, под број 08-6270/32 од 26.12.2019 година (Службен Гласник бр.25 од 2019 година,) донесена од страна на Советот на Општина Центар, Општина Центар објавува јавен повик за финансиска поддршка за поправка и санација на постоечки кровни конструкции и постоечки лифтови на станбени згради на подрачјето на Општина Центар.
“Трета година по ред Општина Центар објавува јавен повик за финансиска поддршка за поправка и санација на постоечки кровни конструкции и станбени згради. Досега се санирани 53 станбени објекти, а проектот е поддржан со средства од буџетот на Општина Центар во висина од 30% од вкупниот износ на вредноста. Ги повикувам сите заинтересирани граѓани и сопственици на заеднички делови од станбените згради да се пријават, да аплицираат на јавниот повик и со тоа да помогнеме, заедно да ги направиме станбените објекти подобро и похумано место за живеење“, изјави градоначалникот на Општина Центар, Саша Богдановиќ.
Проектот ќе биде поддржан со финансиски средства од општинскиот буџет, во висина од 30% од вкупниот износ од вредноста, но не повеќе од 150.000,00 денари за реконструкција на постоечки кровни конструкции и висина од 30% од вкупниот износ од вредноста, но не повеќе од 300.000,00 денари за поправка и санација на лифтови за секоја одобрена апликација, поднесена од заинтересирани сопственици на заеднички делови на колективни станбени згради управувани од Управител на станбени згради или Заедница на сопственици. Селекцијата на одбрани апликанти ќе се врши по принципот „Прв дојден, прв услужен“.
Право на учество имаат сите заинтересирани заедници на сопственици на станови, под следните услови: Доколку се работи за реконструкција на постоечки кровни конструкции, тие треба да бидат оштетени, доколку се работи за поправка и санација на лифтови, тие треба да бидат неисправни, но постоечки; сопствениците на станови да имаат регистрирано заедница на сопственици или да имаат избрано управител на станбена зграда; и најмалку 70% од становите во зградата (влезот) да се користат (се вселени) во текот на целата година (вклучувајќи и изнајмени станови).
Пријавите заедно со целата документација можат да се достават секој работен ден од 9:00 до 15:00 часот директно во архивата на Општина Центар (барака бр.6) или по пошта на адреса ул. Михаил Цоков бр.1 – Скопје, во периодот од 23.11.2020 до 7.12.2020 година.
Повеќе информации и детали за апликација на повикот, вклучително и пријавата за аплицирање, заинтересираните заедници на станари можат да најдат на https://www.centar.gov.mk/?p=10835.
