Веќе пет и пол децении општинското основно училиште „Јохан Хајнрих Песталоци“ претставува синоним за успешна работа во образовниот процес, а денес е училиштен бренд.
Основното образование е темел на натамошното школување и интелектуален развој кај секое дете. Прифаќањето и почитувањето на потребите, можностите и интересите на детето и денес се основни цели и принципи во образовниот процес за кои се залагал и самиот патрон Јохан Хајнрих Песталоци уште во 19 век.
„Овој јубилеј има особено значење и за мене бидејќи пред точно 35 години зачекорив во овие ходници како ученик во прво одделение. Овде се образував и тука почнаа првите пријателства за цел живот. Нашето „Песталоци“ не претставува само синоним за успешно училиште. „Песталоци“ е училиштен бренд! Во изминативе пет децении тука се школувале истакнати уметници, спортисти, политичари и други влијателни личности од општествениот, политичкиот и културниот живот. Нека ви е честит патрониот празник и ви посакувам и понатаму успешно да ја реализирате вашата визија и мисија“, истакна Герасимовски во своето обраќање.
Патрониот празник по повод одбележување на 54-годишнината од работењето на училиштето беше одбележан со музички настап на мандолинскиот оркестар на училиштето и со премиерна изведба на драмската претстава „Нешто чудно се случува“, која што обработува тема за врснично насилство.
