Градоначалникот на Општина Центар, Саша Богдановиќ, денес заедно со своите соработници, изврши увид во градежните активности во градинката „Раде Јовчевски Корчагин“ – клон Пепелашка.
Објектот со површина од 1025 метри квадратни, во кој се наоѓа градинката е еврејска куќа, изградена во далечната 1892-ра година, важи за една од најстарите градинки во Центар и е подарок од сопствениците, кој може да се користи исклучиво за детска градинка.
Темелната реконструкција, прва од ваков тип по 65 години, опфаќа поставување на целосна нова електрична и водоводна инсталација со еколошки цевки, изработени по сите европски стандарди и поставување на енергетски ефикасна фасада на надворешниот дел од градинката, која нема да го наруши изгледот на објектот и ќе ја зачува неговата автентичност.
Со зафатот опфатени се и тоалетите, кои комплетно се обновуваат, а ќе се постави и таканаречена „топла врска“, со што ќе се спојат објектот каде што престојуваат дечињата и салата за одржување на свечености, со што ќе се избегне студот во зимските денови.
Реконструкцијата се финансира од општинскиот буџет, со подзаем од Светска Банка и изведбата чини 340 евра по метар квадратен.
